توركجه طنزلر

قوجاقين اوخشور احسان سيز بهشته !

مني يول وئر او دربان سيز بهشته !

اؤزون هي باغلاما كؤينك، تومانا !

گئدرسن با جي ! تومّان سيز بهشته !

داوارچي «مشدي ايمان »هي وئرير خرج

كي گئدسين كافر، ايمان سيز بهشته !

چكير آجليق قوجا تا حوري آلسين

تا پا جان، گئتدي چون جان سيز بهشته !

بهشتين ايچره كنتور يوخدو كئفلن

گلر گاز پولو يورغان سيز بهشته ؟!

دئدي قزوينلي رضوانه :« سن آلله !

مني گؤندرمه غلمان سيز بهشته »!

جهنّم دير اگر گلسه عزيزيم

يالانچي ، اوغرو ، وجدان سيز بهشته !